Тагтаа засварлах энгийн арга ба интерьерийн шийдэл

Орон сууцныхаа тагтыг хамгийн энгийн аргаар засварлах болоy илүү тав тухтай болгоход тань туслах дараах зөвлөгөөг хүргэж байна. 

 

Эхний хэсэг, тагтаа хэрхэн засварлах вэ? 

1. Эхний үе шатанд тагтны хавтан болон хашлагын металл бүтээцийн бүрэн бүтэн байдлыг сайтар шалгах хэрэгтэй. Энэхүү төмөр хашлагын загвар, хийцийг өөрчилж, нэмэлт хүрээ төмрийг хашлагын гадна талд бэхэлнэ.

 

2. Ийнхүү нэмэлт хүрээ төмрийг металл хашлагын гадна талд суурилуулахад тагтны урт, өргөн нь 30-50 см-аар нэмэгддэг. Нэмэлт хүрээг дээд хэсэгт нь тагтны металл хашлагын бариултай, доод хэсэгт нь төмөр бетон хавтантай бэхэлнэ.

3. Дараагийн шатанд нэмэлт хүрээ төмрийн гадна талаар хөндлөн чиглэлтэй банзан хана хийнэ. Эдгээр хана нь түүний  гадуур хийх нүүрлэгээний суурь болж өгнө. 



4. Тагтны гадуур  нэгэнт хийсэн модон хайрцагны гадна талаар  20х40 мм хөндлөн огтлол бүхий савх мод хадна.  Ингээд тагтны  модон бүтээцийг ялзралаас хамгаалах  элдэв шавьж үржих, үүрлэхээс сэргийлэх зорилгоор үжил эсэргүүцэх  будгаар будна.

5. Тагтны гадуур сайжруулсан хуванцар, эсвэл металл сайдингаар нүүрлэгээ хийнэ. Сайдингийг савх модонд шургаар бэхэлнэ. Мөн цонхны тавцанг угсарч, хуванцар бүрээстэй металлаар усны хаялга хийгээд уулзвар, залгаасуудыг ус орохооргүй шавж битүүлнэ.

6. Дараа нь хөнгөн цагаан, эсвэл хуванцар цувимал хүрээ бүхий цонхуудыг угсарна. Ингэхдээ эхний ээлжинд хоёр хажуугийн цонхыг угсарч, тагтны саравч болон хөвөөнд найдвартай бэхэлж, зай завсрыг битүүмжилнэ.

7. Хажуугийн хүрээг суурилуулсны дараа нүүрэн талын цонхуудыг суулгана. Эцэст нь цонхны нээгдэж, хаагддаг самбаруудыг угсарч, тагтны саравчийн дээврийг хийнэ.


 

Тагтаа тохижуулах интерьерийн шийдэл                 

1. Энгийн буюу минимал интерьер

Минимализм бол хамгийн  энгийнээр сэтгэл ханамжтай амьдрах тухай гүн ухааны урсгал бөгөөд тус урсгалыг дагагчдыг минималист гэж нэрлэнэ. Харин интерьерт энгийн геометрийн дүрсэд тулгуурласан, олон төрлийн өнгөний хослолгүй, эмх цэгцтэй, цэмцгэр хэв маягийг минимал гэлэг. Тиймээс та хэт тасаг хэрэглээг үгүйсгэдэг, энгийн амьдрах, эмх цэгцэд дуртай хүн бол минимал хэв маягаар тагтаа тохижуулах хэрэгтэй. Хар цагаан өнгө болон тэгш хэм нь тус урсгалын гол элемент. Минимал интерьерийн  бэлэн загвар олдоц ихтэй. Мөн энэ урсгал өөрөө тансаг хэрэглээнээс татгалзаж энгийнд тэмүүлдэг хямд төсвөөр байгуулж болно.  

               

 

2. Минималын эсрэг Бохо шик

Минимал интерьерийн шийдэл нь цөөхөн эд агуурс ба эмх цэгцийг эрхэмлэдэг бол бохо шик буюу богем хэв маяг гоёмсог, экзотик, байдлыг бий болгодог. Нэг талаараа замбараагүй ч гэж болно. Уламжлалт хэв маягаар сэтгэх дургүй, амь хөгжимд дуртай хүмүүст энэ төрлийн интерьерээр тагтаа тохижуулах нь тохиромжтой. Олон төрлийн тод өнгө, гар урлалын эд зүйл , ногоон ургамал, хээ угалз бүхий хивс, хуучин тавилга зэрэг нь богем хэв маягийн гол элемент. Жинхэнэ бохо шик бүрдүүлэхэд хэрэгтэй тавилгууд хуучных бөгөөд гар хийцийнх байх хэрэгтэй. Тус урсгал олон төрлийн жижиг эд хэрэглэлийг нэгэн дор агуулдаг.  Бидний сайн мэддэг зүүд манагч нь бохо шик интерьерийн салшгүй нэг эд зүйл билээ.